rangier

Rangier, m. acut. dysyllab. Est une espece de beste entre Daim et Cerf, de la hauteur du Daim, mais un peu plus gros, de teste plus grande et plus chevillée que le Cerf, car il porte bien quatre vingt cors, ayant toute la paulmure derriere, hormis les antoilliers, là où le Cerf l'a devant, ausquels sont paulmures, car ils ne les ont aigus comme le Cerf. Estant mal-mené il met sa teste bas, si estant acculé à quelque arbre, et en fait tout son rampart, s'en couvrant tout le corps comme d'un bouclier, ainsi que le Cerf fiert des antoilliers de dessoubs, le Rangier frappe des ergots de dessus: mais c'est bien moindre coup. Il est de plus grande venaison que le Cerf, et va au rut quand le Cerf l'abandonne, comme fait aussi le Daim, et porte comme une Biche. Phebus dit que de Rangier il n'en a point veu en Romain païs, trop bien en Mauritanie, où il l'a veu prendre à force à des chiens qu'il nomme Baulx.

Thresor de la langue françoyse. Jean Nicot.